የኢትዮጵያ ኢንዱስትሪ ግብዓቶች ልማት ድርጅት(ኢኢግልድ) ፈረንሳይ ለጋሲዮን በሚገኘው የሽያጭ ቅርንጫፉ በቅርቡ ያቋቋመውና ስራ ያስጀመረው የክር ማጠንጠኞ ማዕከል ሰራተኞች መስከረም 9 እና 10/2018 ዓ.ም በአልሳም እና ቡሉኮ ጨርቃጨርቅ ፋብሪካዎች ተገኝተው የመስክ ጉብኝት እና ምልከታ አካሄዱ፡፡

የፕሮጀክት ጥናት ክትትልና ድጋፍ ዳይሬክቶሬት ዳይሬክተር አቶ አለማየሁ ወ/ዮሐንስ እንደገለጹት ኢኢግልድ ፈረንሳይ ለጋሲዮን በሚገኘው የሽያጭ ቅርንጫፉ የክር ማጠንጠኛ ማዕከል አቋቁሞ የተጠነጠኑ ክሮችን ከፈትል እና ጨርቃ ጨርቅ ፋብሪካዎች ገዝቶ ምርት በማምረት በማጠንጠን በሽመና ስራ ላይ ለተሰማሩ አነስተኛና መካከለኛ ኢንዱስትሪዎች እና ኢንተርፕራይዞች ለገበያ እያቀረበ የሚገኝ ሲሆን የጉብኝቱ ዓላማም ማዕከሉ በቅርብ ቀን የተቋቋመ ከመሆኑ አንጻር በዘርፉ የካበተ ልምድ እና ተሞክሮ ካላቸው ተመሳሳይ ተቋማት ልምድ ወስደው የማምረት አቅማቸውን በማጎልበት በቀጣይ ማዕከሉን ምርት እና ምርታማነት ለማሳደግ ነው፡፡

በጉብኝቱ የተሳተፉት ሰራተኞች በሁለቱም ፋብሪካዎች የክር ማጠንጠኞ ክፍል በመገኘት ከምርት ግብዓት ዝግጅት ጀምሮ ምርት እስከሚመረትበት ደረጃ ፤ በእያንዳንዱ የምርት ሂደት የሚከናወኑ ተግባራቶችና የአመራረት ሂደቶች ፣ የምርት የጥራት አጠባበቅ ዘዴ፣ በምርት ጥራት አጠባበቅ ሂደት ላይ የሰራተኞቹ ሚና እና ድርሻ፤ የፋብሪካዎቹ የምርት የጥራት መለኪያ መስፈርቶች ፤ የፋብሪካ ሰራተኞች የሥራ ባህል እና ዲስፕሊን እንዲሁም በሌሎች ተጓዳኝ ጉዳዮች ላይ ሰራተኞቹ ግንዛቤ፤ ልምድ እና ተሞክሮ እንዱወስዱ ተደርጓል፡፡

በመስክ ጉብኝቱ የተሳተፉ ሰራተኞች እንደገለጹት ድርጅቱ ለማዕከሉ ሰራተኞች ትኩረት ሰጥቶ ይህን ጉብኝት ማዘጋጀቱ የስራ ተነሳሽነት የፈጠረላቸው ከመሆኑም በላይ ተጨማሪ ዕውቀት፣ ልምድ እና ግንዛቤ ያገኙበት እና ያገኙትንም ልምድ ተግባራዊ እንደሚያደርጉ ገልጸው እንደዚህ ዓይነት ፕሮግራሞች ቀጠይነት እንዲኖራቸው አስተያቶቻቸውን ሰጥተዋል፡፡

በመጨረሻም በመስክ ጉብኝቱ የተገኙት ልምዶች እና ምርጥ ተሞክሮዎችን ተቀምረው ወደ ማዕከሉ በማስፋት ተግባራዊ የሚሆንበት ሁኔታ እንደሚመቻች የማዕከሉ ዳይሬክተር አቶ አለማየሁ ወ/ዮሐንስ ገልጸዋል፡፡