የኢትዮጵያ ኢንዱስትሪ ግብዓቶች ልማት ድርጅት በ2018 በጀት ዓመት የመጀመሪያ ስድስት ወራት ለተገኘው ውጤት የላቀ አስተዋጽኦ ላበረከቱ የዲስትሪክቶችና የሽያጭ ቅርንጫፎች ጥር 19 ቀን 2018 ዓ.ም ዕውቅና ሰጠ፡፡

ኢኢግልድ ይህንን እውቅና የሰጠው የድርጅቱን የ2018 በጀት ዓመት የመጀመሪያ ስድስት ወራት ዕቅድ አፈጻጸም ለሁለት ቀናት እየገመገመ በሚገኝበት ወቅት ነው፡፡

አቶ ዳዊት አዳነ የኢኢግልድ ዋና ሥራ አስፈጻሚ ተወካይ በዕውቅና አሰጣጥ ስነሥርዓቱ ላይ እንደገለጹት ለተገኘው ውጤት የላቀ አስተዋጽኦ ያበረከቱ የዲስትሪክትና የሽያጭ ቅርንጫፎች ሃላፊዎችና ባለሙያዎች ባለፉት ስድስት ወራት የሳዩትን ተነሳሽነት አጠናክረው እንዲቀጥሉ፤ በቀጣይም ሌሎቹ ቅርንጫፎች ዕውቅና ያገኙትን የስራ ክፍሎች እንደአርአያ በመውሰድ ትኩረት ሰጥተው ሊሰሩ እንደሚገባና ተሳትፏቸውንም አጠናክረው እንዲቀጥሉ አሳስበዋል፡፡

ለሁለት ቀናት በተካሄደው የግምገማና የውይይት መድረክ የድርጅቱ የመጀመሪያ ስድስት ወራት የኦዲት ምርመራ ግኝት፤ የተመረጡ ቅርንጫፎች የግማሽ ዓመት አፈጻጸም፤ የአራቱ ዲስትሪክት ጽ/ቤቶች አፈጻጸም እንዲሁም የኢኢግልድ የኮርፖሬት የስድስት ወራት አፈጻጸም ሪፖቶች ቀርበው በጥልቀት ግምገማና ውይይት ተካሂዷል፡፡

በውይይቱ መደረክ ላይ እንደተነሳው በአፈጻጸም ወቅት የመፈጸም አቅማቸው ዝቅተኛ የሆኑ ቅርንጫፎች ምክንያቶች እንዲቀርቡና እንዲለዩ ተደርገው በስፋት ውይይት ተካሂዶባቸው የመፍትሔ ሐሳብ እንዲቀመጥ ተደርጓል፡፡

በማጠቃለያም የድርጅቱ አመራሮችና ባለሙያዎች ባለፉት ስድስት ወራት የተገኘውን የተሻለ ውጤት ለማስቀጠል ተግተው እንዲሰሩ ከድርጅቱ የበላይ አመራሮችና ሃላፊዎች አቅጣጫ ተቀምጧል፡፡

የኢትዮጵያ ኢንዱስትሪ ግብዓቶች ልማት ድርጅት አምራች ኢንደስትሪዎች ያለባቸውን የግብዓት አቅርቦት ችግር ለመቅረፍና የአምራች ኢንዱስትሪዎችን ምርቶች በተመጣጣኝ ዋጋ በማቅረብ ገበያውን የማረጋጋት ሥራዎችን የሚያከናውን የመንግሥት የልማት ድርጅት ነው።