የኢትዮጵያ ኢንዱስትሪ ግብዓቶች ልማት ድርጅት በ2018 በጀት ዓመት ስምንት ወራት የተገኘው አበረታች አፈጻጸም ውጤት ተጠናክሮ ሊቀጥል እንደሚገባና በየእርከኑ የሚገኙ የዘርፎች፣ ዳይሬክቶሬቶች እና የዲስትሪክት ጽ/ቤቶች አመራሮች በቀሪው አራት ወራት በቁርጠኝነትና በትኩረት ሊሰሩ እንደሚገባ ተገለጸ፡፡

የኢኢግልድ ተ/ዋና ሥራ አስፈጻሚ አቶ ዳዊት አዳነ ይህንን የገለጹት ለሁለት ቀናት ሲካሄድ የነበረውን የድርጅቱ የ2018 በጀት ዓመት የውይይትና የግምገማ መድረክ መጋቢት 8 ቀን 2018 ዓ.ም ማጠናቀቂያ ላይ ሲሆን በበጀት ዓመቱ የዘርፎች፣ ዲስትሪክት ጽ/ቤቶችና ዳይሬክቶሬቶች አመራሮች እንዲሁም የድርጅቱ ባለሙያዎችና ሠራተኞች ጥረት ከፍተኛ አስተዋጽኦ እንዳለው አመልክተው፤ ከዚህም ባሻገር የድርጅቱ ግዢና ሽያጭ አፈጻጸም፣ የድርጅቱን የፋይናንስ የአሰራር ሥርዓት ለማሻሻልና ለማዘመን እየተሰራ ያለው ሥራ፣ በድርጅቱ እየተተገበረ ያለው የኢንተርፕራይዝ ሀብት እቅድ/አስተዳደር(ERP) ትግበራ እና የድረጅቱን የ2016 በጀት ዓመት ሒሳብ በውጭ ኦዲተር ተጣርቶ ማረጋገጫ መገኘቱ በዋናነት በስኬት ሊነሱ የሚችሉ ሥራዎች እንደሆኑ ገልጸዋል፡፡

አያይዘውም የተገኘውን ውጤት ለማስቀጠልና የአሠራር ክፍተት የታየባቸውን ተግባራትና የስራ ክፍሎች እንዲሻሻሉ የድጋፍና ክትትል ሥራዎች ተጠናክረው እንዲቀጥሉ የአመራሮች ሚና ወሳኝ በመሆኑ ትኩረት ሰጥተው እንዲሰሩ፤ በቀሪዎቹ አራት ወራት በየእርከኑ የሚገኙ ባለሙያዎች በየሥራ ክፍላቸው የተሠጣቸውን ተግባርና ሃላፊነት በተገቢው መልኩ ሊወጡ እንደሚገባ ጨምረው አሳስበዋል፡፡

ለሁለት ቀናት ሲካሄድ የነበረው የድርጅቱ የስምንት ወራት ዕቅድ አፈጻጸም ግምገማ መድረክ በቀሪዎቹ አራት ወራት የበጀት ዓመቱን ዕቅድ ለማሳከት የሁሉም የሥራ ክፍሎች በትኩረት ለመስራት የጋራ መግባባት ላይ ተደርሷል፡፡

የኢትዮጵያ ኢንዱስትሪ ግብዓቶች ልማት ድርጅት የኢንዱስትሪ ግብዓቶችን ለአምራች ኢንዱስትሪዎች የሚያቀርብና ኢንዱስትሪዎች ያመረቷቸውን የኢንዱስትሪ ውጤቶች በተመጣጣኝ ዋጋ በማቅረብ ገበያ የማረጋጋት ሥራዎችን የሚያከናውን የመንግስት የልማት ድርጅት ነው፡፡